[樂評] Masta Mic﹣《流行反擊戰》(2013)

[樂評] Masta Mic﹣《流行反擊戰》(2013)

造反有理,流行無罪!

廠牌:Masta & Co Ltd
類型:Hip-Hop
格式:CD
發行日期:2013-03-26
評分:7.8/10

「地下上唔到大場面,嚟自地下嘅永遠只可以企場邊」,MastaMic的《流行無罪》開炮即要替一班仍活在「地下」嘅音樂人鳴冤叫屈、抱打不平,皆因畸形嘅香港樂壇,主流過度強勢,令Indie嘢常常被大眾忽視,佢哋很難抬得起頭。呢種情況讓我諗起碼頭啲工人,辛酸有誰知,一間間財雄勢大嘅唱片公司,永遠佔有最好嘅資源,卻千方百計只想往「利益」的方向靠攏;而傳媒跟佢哋錯綜複雜嘅關係,好比為外判商,從來都很少替如碼頭工人的獨立音樂人著想,擔當不了「工會」的協助角色。因此,聽眾長期受這樣的傳媒環境影響,自然被培育出單調的審美習慣,他們會漸漸認定主流的一套做法為「標準」,偏門的「入屋」門檻就相對被提高,獨立音樂人的發展機會受阻重重,致使今日香港樂壇的持續頹勢,惡性循環從未有過大嘅改善。

為了應對如此嚴峻嘅形勢,MastaMic決定要發起一場反擊,流行的音樂元素成為佢反擊的重要武器,有種「以其人之道還治其人之身」的意味。而更根本的動機,MastaMic係想通過大眾易接受嘅方式,讓更多人能夠領略到獨立音樂的好,這就像最近發起的工潮,開放了碼頭畀市民入內,讓佢哋有機會去直接感受到碼頭工人嘅艱辛,讓碼頭工人得到本來應該有嘅尊重,「當主流嘅趨勢越嚟越封閉」,MastaMic卻執意捍衛音樂的靈魂,因為佢「相信可以飛,堅信終有機」,只要念念不忘,總會產生迴響。

不同很多死氣沉沉、悶到爆嘅港式流行音樂,馬米的新專輯首先表現出一種年輕又無懼嘅活力,《Game Over》、《GO!》、《Showtyme》等等作品,要話有咩創新性呢?又唔係,未接觸過很多hip-hop嘢嘅聽眾,至起碼喺以前農夫啲作品入面,能搵到類似嘅元素。不過MastaMic嘅Rap就係有股衝力,好似受夠了被壓迫、剝削嘅工人,終於要爆發、起哄咁,啱嗮啲熱血嘅80後去聽。喺現今浮躁多膠事嘅社會,年輕人又未上到岸買樓買車,佢哋自然滿肚多鬱結,MastaMic的新專輯其實就係對準呢個缺口,留時間畀人去邊聽邊發泄怨氣,好似連珠炮發、一地子彈嘅《Hate Me》,怎一個「爽」字了得!馬米強勁的炮轟,令農夫喺佢面前,都變成未戒奶的小孩,然事實上,香港自LMF之後,就少了「硬派」的hip-hop稱霸,期間的陳冠希、歐陽靖,一個比一個快陽痿,而MastaMic嘅出現有望振興港式hip-hop的雄風,佢要用自己得天獨厚的潛能,為hip-hop界贏回一場「硬」仗。

呢張《流行反擊戰》嚟自地下式嘅流行,冇搞太多複雜嘅音樂肌理,易入耳係專輯的重要目標,歌曲「大路」係「反擊戰」的關鍵戰略。Feat. C ALLStar的《Shine》背後裝點嘅嗰幾粒音,真係好聽到能發出吸引人嘅閃亮;《流行無罪》順暢無比的旋律,配合氣勢的口號,叫大家一齊大合唱的時間又到了;還有《Loser》喺失意處慢慢抬頭仰望嘅感覺,副歌如昇空飛翔,展示出(而)家廣東流行少見的開闊空間……MastaMic的新專輯即管要高舉「流行」嘅大旗,但「堅守自己信念的火把」一直在傳遞,《禁歌》不畏被禁直說心底話,使到馬米「唔妥協」的真性情,終於喺最後時刻能得以爆發,佢嘅「流行」抗爭,只作為一種手段,如馬汀.路德金的公民抗命,雖非用暴力抵抗,然唔係代表軟弱。

香港樂壇目前的惡劣環境,是在優秀創作不多的情況下,好歌又沒有好報。好在最近的《Hate Me》能奪得叱咤903一週冠軍的寶座,算係令呢場反擊戰贏取到一個小勝利,並讓馬米的抗爭獲得了響應。不過,正如大資本家不容易就咁被嚇到一樣,樂壇所累積下的一啲唔合理規則也不是容易被修改,MastaMic要實現「主流未來係由地下製造」嘅美好愿景,還是有一大段很艱難嘅路等住你們呢班音樂人嚟行。

﹣田中小百合|原文連結

推介歌曲:
Hate Me(Feat. Jerald)

專輯完整曲目:
1. Intro (七年)
2. Game Over
3. 長大
4. GO!
5. Showtyme Feat. 咖啡因公園
6. Hate Me Feat. Jerald
7. Sorry
8. Shine Feat. C ALLStar
9. 流行無罪
10. 上位 Feat. 側田 & Jerald
11. Loser Feat. Sunny@Supper Moment
12. 禁歌

(0)     , , , , ,

Post a Comment

Your email is never published nor shared. Required fields are marked *

*
*

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

© 2010 - 2015 Cuetone Media Group Limited, all rights reserved / 本站內容,未經發布者同意,禁止以任何方式轉載、刊登、傳送、或複製,違者必究